موضوع: رئيس مصر القادم الثلاثاء 15 مايو 2012, 12:39 am
رئيس مصر القادم من هو رئيس مصر القادم السؤال الان المطروح امام كل المصريين والذي يشغل بالهم بشكل رئيسي هو من يكون رئيس مصر القادم ..
وخلال الايام الماضية حاول الكثيرين طرح اسماء ليتم اختيارها في قائمة رئيس مصر القادم لكن غالبيتها لم تجد قبولا لدى العامة او تم حرقها خلال احداث مصر الاخيرة وحتى مجرد الاستفتاء عليهم كشخصيات مرشحة لمنصب رئيس مصر القادم غير مطروح ..
اكيد كل واحد فينا عايز يعرف مين رئيس مصر القادم انت هترشح مين واحب كمان اصحبنا الى مش مصرين يشركونا الراى مين يكون رئيس مصر منتظره رايكو فى مين رئيس مصر وانت هترشح مين
موضوع: رد: رئيس مصر القادم الثلاثاء 15 مايو 2012, 6:29 am
مموضوع هايل لميس بس احب ابتدى بالصوره دى
هو انا شايف فى ناس كثيره كويسه وبرنامجها الانتخابى رائع وفى الغالب معظم البرامج الانتخابيه شبه بعض فى كثير من النقاط لكن فى منهم قليل الخبره والى منعرفش تاريخه السياسى والوطنى انا شايف ان اقوى المرشحين من وجهة نظرى البسيطه ومن تاريخهم هما عمرو موسى وابو الفتوح وبعدهم مرسى وهقولك ليه اولا المرسى عشان الجماعه الاسلاميه وعشان هو مرشح الاخوان ونسبة لشعبيتهم وقدرتهم على الاقناع وتاثيرهم على الشارع المصرى ولونهم خسرو اصوات كثيره فى الفتره الاخيره ثانيا عمرو موسى نظرا لمواقفه السياسيه فى ظل عهد مبارك فكم رجل استطاع ان يفعل كما فعل عمرو موسى عندما كان وزيرا للخارجيه فما كان من النظام السابق حتى اطاح بيه فى منصب رفيع المستوى وهو امين عامل جامعة الدول العربيه ولكن ابعده عن الساحه السياسيه المصريه ثالثا ابو الفتوح وهو يتمتع بالعقل والحكمه والتحفظ فهو رجل يكاد ان لا يكون عليه غبار له تاريخه الذى لما نسمع به اى لغط وله برنامج رائع وفكر وصاحب شفافيه انا شايف ان المنافسه بين الثلاثه دول وانا بميل للاحد الاثنين ابو الفتوح او عمرو موسى ولون لى بعض التحفظات على شخص موسى بما انه سيمثل قدوه للمصرين والى اغلبهم من المسلمين
موضوع: رد: رئيس مصر القادم الثلاثاء 15 مايو 2012, 6:25 pm
صاااعق
شكرا لرائيك وانا اتفق معاك فانا اميل الى ابو الفتوح وعمرو موسي ولي ايضا بعض التحفظات على عمرو موسي تخص شخصيته ولكن في سبيل مصلحة الوطن ممكن اتغاضى عنها وابو الفتوح ارجحه اكتر كشخصية وفعلا البرامج متشابهة جدا بس ده كله لسه كلام اهم من ده التنفيذ
موضوع: رد: رئيس مصر القادم الثلاثاء 15 مايو 2012, 6:32 pm
وده رائي مواطن مصري
--- مــا أحلـــم بــه لمستقبـــل مصــــر --
( أخيراً ) : أريد مواطن مصري مسلم معتدل -وليس متأسلم- ** مثقف / متعلم ** و يتمتع بمعظم الصفات التالية:
-ذو ثقافة داخلية: فيعلم مشاكل الغالبية العظمي من الشعب و يعلم كيف يبدأ في إصلاحها كذلك يعلم كيف يقضي علي المشاكل الطائفية ، وله رؤية لوضع حلول عاجلة حالياً،وحلول مستدامة مستقبلاً. -ذو ثقافة خارجية : لابد أن يكون قارئ جيد للتاريخ عامة -خاصة تاريخ مصر- فيستطيع التعامل مع الدول الأخري بحكمة وعقل ولا يدخلنا في صدامات خارجية. -ذو شخصية قيادية : فيستطيع قيادة مصر و النهضة بها داخلياً وخارجياً ، و يعلم كيف يختار مساعديه و مستشاريه و كيف يستفيد منهم و يتعاون معهم، و أن يكون علي قدر عالي من الدبلوماسية فيعلم كيف يتعامل بحكمة وعقل مع شعبه داخليا و مع الدول و الأنظمة الأخري خارجياً. -كونه مسلم - وليس متأسلم- : فهو نزيه / نظيف اليد غير وصوليّ ، عادل / فالعدل أساس الملك ، متواضع، مؤمن بأن الرأي شوري / وليس ديكتاتور لا يقبل المعارضة، يتقي الله في شعبه ، يحترم الأديان فيعلم كيف يعطي كل ذي حق حقه ، يحترم صغير السن و كبير السن و يحترم المعوّقيين و أصحاب الحالات الخاصة و اصحاب القدرات المحدودة ..و يعلم أنهم جزء ضليع ولا ينفصل عن نسيج مجتمعنا المصري ... وبالتالي يوفر لهم قدر من الحياة الكريمة و فرص العمل مثل باقي المواطنين. -اريد رئيساً يعلم قدر مصر و المواطن المصري، القدر و المكانة التي تستحقها مصر فعلاً و ليس قولاً ، وليس الذي وصلنا له من سؤ علي يد الأنظمة السابقة . - كونه مسلم وليس متأسلم : فإنه يعلم أن تطبيق الدين الإسلامي غاية و أن الحياة التي نعيشها كاملة هي إنعكاس لعقيدتنا ، فإذا إنصلح ديننا بالفعل إنصلحت دنيانا و سنري ذلك منعكسا علي مجتمعنا لا جدال ، إذا فهو يعلم أن الدين ليس وسيلة للوصول للغايات !! - أريد رئيساً يعلم ثروات مصر و إمكانياتها الطبيعية و إمكانيات أبنائها و قدراتهم، وهي ما وهبها الله لمصر و لأبنائها دون غيرهم، و بالتالي يكرّس عمله علي إستغلال هذه الثروات و هذه الإمكانيات و تطويرها و بالطبع الحفاظ عليها لأجل الأجيال القادمة. - يرضي لأبناء شعبه ما يرضاه لنفسه و لأسرته و لأبنائه فقط و العكس. -اريد رئيساً أتشرف به و بقيادته لنا أينما ذهبت ، فبالتالي كلاً منا سيعمل معه يداً بيد و يتعاون معه كلاٌ في مجاله " داخل مصر وخارجها" ... فقط من أجل مصر و من أجل غداٍ أفضل لنا و للأجيال القادمة.
موضوع: رد: رئيس مصر القادم الأربعاء 16 مايو 2012, 12:37 am
طيب ... بداية كدا انا مع اى مرشح غير انه يكون من الفلول ... احمد شفيق او عمرو موسى ... ومحدش يستهون بكلمة فلول ...فلول يعنى تبع النظام السابق ومع العسكرى بكل تجاوزاته دلوقتى ... واظن دا واضح جدااا قى تصريحات شفيق انها هيحرق الميدان بالى فيه لو حصلت ثورة فى حالة فوزه ... وواضح جداا فى تصريحات عمرو موسى الى شايف فيها انه العسكرى برىء والشعب ياعينى جاى عليه ويقول هيعملهم ايه .. او الى بيخير الناس بين الاسلام والحداثه والمدنيه على اساس انه الاسلام دين التخلف مثلا ... او يمكن يكون الخمر فعل برأسه ما فعل خخخخخخخ ... غير انه الناس دى اصلا كانوا ضد الثورة ومع نظام مبارك ... حتى عمرو موسى الى بيقول انا كنت معارض قبل الثورة قال مصر دولة كبيرة والرئيس مبارك رئيس قوى ... ومصر مش زى تونس .. وراح للثوار قالهم ارجعوا ... انا بس عايزة اقول لكل واحد رايح يدى صوته لفلول اتقى ربنا فى صوتك .. ورسالة من ام شهيد بتتحسبن فيها على كل واحد هيدى صوته لفلول ... وانه ربنا يدوقه من الى داقته ... الناس دى لا هتحاكم مبارك ولا هتجيب حق شهدا ولا هتحقق ديمقراطيه ... ووقتها فعلا ... هتكون ماتت الثورة ...
دى كلمه كان لابد انى اقولها .... بالنسبه لرأيى انا فالحقيقه الفترة الى فاتت كنت محتارة بين محمد مرسى .. وعبد المنعم ابو الفتوح ... واخيرا ان شاء الله صوتى لمحمد مرسى ... لانى الى فهمته مؤخرا انه حوار انتخاب الرئيس دا حاجه كدا زى اختيار ملكه انجلترا ... حاجه كدا اشرافى ... كله جاى بمشاريع بس محدش هيقدر ينفذها الا محمد مرسى ... هو جاى كدا اشراف والاخوان والحزب تحت منه بينفذ المشروع الى مرسوم ليهم ... متهيالى البلد مش محتاجه اكتر من كدا الوقت دا ... وزى ما قال ابراهيم عيسى الى مش بيحب الاسلاميين ولا غيره كل الرؤساء الى جايين بمشاريع مش هيقدروا ينفذوها .. ما عدا محمد مرسى المدعم بحزب وجماعه تحت قيادته تستطع تنفيذ كل ما يريده ... وقال انه الرؤساء الى جايين بمشاريع لو عايزين ينفذوها يبقى ميقدموش نفسهم لرئاسة الجمهورية ... يقدموا نفسهم لرئاسة الوزراء ...عشان يقدرو يحققوها ... وبناء عليه على رأى الكتاتنى .. انا مع الاخوان ... مرشح اسلامى وجماعه منظمه مجتهده فاهمه سياسه ... نأمل ونتمنى من الله انه يرقوا بالبلد امين .. وولى الله من يصلح امين ... شكرا لميس لطرحك وموضوعك .... ليلى المسلمه ................................................
موضوع: رد: رئيس مصر القادم الأربعاء 16 مايو 2012, 5:15 pm
وليا تعليق بسيط ع سلمى هو ان الجيش نفسه هيطبق العرف
لو اى رئيس مسك وقامت عليه مظاهرات فى اى ميدان
لانه هيكون رئيس منتخب واللى هيعمل مظاهرات يبقى عايز يهدم البلد
فى الوقت الحالى وشفيق قال لو هيتعمل مظاهرات سلميه من غير اعاقة لحركه المرور
هتبقى عاديه ومحدش هيدخل بينهم لكن لو عملو زى ما حصل قبل كده فهو هيدخل شخصيا
وده بتيهالى اى رئيس هيعملوه مش شفيق بس
يابنى انت سرحان فى ايه ... انا ليلى مش سلمى ههههههههههههههه ... المذاكرة شكلها ماثرة عليك ... ربنا يوفقك امين ... بص جيمى ... الى قاله شفيق مش كدا خالص ... بعدين معلش دا واحد شايف انه موقعة الجمل ناس كانت رايحه ترقص وتطبل فى الميدان ... واحد كان يتمنى فشل الثورة ... واحد كان لاخر لحظة مدافع عن مبارك ونظامه ... مستنى منه ايه بقى ... هيجى يحاسب مبارك على فساده وهو اصلا كان بيدافع عنه ؟؟ هيجى يعامل الثوار كويس وهو اساسا معارض الثورة ؟؟ هيجى يجيب حق الشهدا وهو شايف انه موقعة الجمل كانت رقص وطبل ؟؟ هيجى يحاكم جمال وعلاء وهو اساسا مشترك معاهم فى الفساد وبايعلهم الاراضى زى ما شوفنا المستندات ... اساسى انه مش هيعمل كدا ؟؟ طيب لما هو مش يعمل كدا مين بقى هيرضى بكدا ... ام شهيد مثلا بتموت كل يوم قهر انه لسه مجاس حق ابنها لحد النهارده ... ثوار شافوا اخواتهم بيموتوا قدام عنيهم ومصابين عايشين بنص اعضائهم لحد النهارده محدش حتى عوضهم باى حاجه ... شعب عرف انه كان مضحوك عليه طول السنين الى فاتت ومسروقه ثرواته وفيه ناس بتاكل من سورى يعنى الزباله ... شباب فقدوا عيونهم عشان ظابط ملازم اول غاوى ينشن على العيون وغيره كتييير ... واذا كان مش قبلناه وزير هنقبله رئيس ... دا كفاية انه بعد تركه الوزارة بيوم اتحرقت كل ملفات امن الدولة واتفرمت ... والكل فهم وقتها انه هو فعلا كان متستر على فضايح وجرائم النظام السابق والله اعلم الاوراق الى اتفمرت دى كان فيها ايه .. الثورة مقامتش عشان الناس دى ترجع تحكمنا تانى ... الناس دى مكانها تتحاسب ... دا كفايه انه ادارة حملته من مكتب سابق للحزب الوطنى ... الحزب الى مكفهوش الى حصل ايام الثورة لاء ولحد النهارده لسه بيخرب ويدمر ... واقرب حاجه احداث بور سعيد والعباسيه ... ايه التغيير بقى الى غيرناه عشان يرجع تانى يحكمنا النظام القديم ... وايه لازمتها الثورة بقى والناس الى ماتت ... كنا خلينا فى حكم مبارك بقى وخلاص طالما فى الاخر هنرجعله تانى ... انا بقول كدا عشان اريح ضميرى والله جيمى مش قصدى احكر على رأيك ... فى الاخر دى حريتك بس والله حرام نبيع دم الشهدا باختيار الناس دى ... اى حد تانى انا معاك ... بس مش حد ابداا كان ليه ايد فى اذيتنا يوم من الايام باى شكل من الاشكال ... حتى لو كان تستر على نظام فاسد دى فى حد ذاتها جريمة لا تغتفر فى حق الشعب ... انا سعيده بالنقاش معاك جيمى ... واسفة للاطاله ... كانت معكم من ارض الوطن ... فى قلب مصر ... ليلى المسلمه ههههههههههههههههه ....................................................
موضوع: رد: رئيس مصر القادم الخميس 17 مايو 2012, 5:07 pm
~.•Ģ.£.m.Ў•.~ كتب:
ههههههههههه هعمل ايه بقى
لو ع احمد شفيق فانا كنت فى الميدان ايام الثروة وناس كتير هتفت باسمه انه يسيب منصبه
عشان ما يخسر احترام الناس ليه وفعلا هو ساب منصب واستقال
وبعدين اهو تولى المسئوليه قبل موقعة الجمل بيوم يعنى ملحقش يعمل حاجه
ودى عمليه مدبره والمحكمه نفسها لحد دلوقتى مش قادره تاخد قرار واحد عليها
انا مش مع شفيق او ضده لكن هو راجل محترم وليه شعبيه كبيره وقادر
على المسئوليه هو او ابو الفتـوج
لكن انى انتخب اى حد من الاخوان ده استحاله لانى مش بحبهم
لانهم منافقين ومعظم الناس عرفت نفاقهم فى الفتره الاخيره
خصوصا بعد حركه ابو اسماعيل والكل عارف
انهم فى البدايه قالو انهم مش هيترشحو للرئاسه واللى حصل دلوقتى
انهم عايزين الرئاسه باى شكل من الاشكال
عشان يبقى معاهم مجليش الشعب والرئاسه ونبقى بكده
عملنا حزب وطنى جديد من تانى
وهيكون اصعب من الاولانى
وده رائي فيهم من قبل ما الثورة تقوم ولحد الان مش هيتغير
الا اذا بثتو هما عكس ذلك وقتها هحترمهم فعلا
لكن انا شايف انهم مش قدر المسئوليه وكفايه اللى بيحصل فى المجلس
روحى بقى اعملى العشاء ليلى وسيبك من السياسه
وانا عندى امتحانات وخليها زى ما تيجي تيجي ههههههه
هههههههههههههه ربنا يعينك يامجتهد خخخخ ... بص شفيق اصلا لو كان محترم كان رفض المنصب فى الوقت الى هو شايف البلد فيه بالوقت دا ... وانا مش بقولك انتخب الاخوان ... بس انا بقولك على نقطه معينه ... انه بلاااش حد من النظام السابق عشان مش هنبقى عملنا حاجه ... امبارح كنت بكلم صديق ليا بيقوله اوعى ترشح حد من الفلول ... هو مجابش سيرة شهدا ولا مصابين ولا مبارك ولا اى حاجه ... قالى كلمة بسيطة اوى ... هو انا نزلت الميدان وايدى اتكسرت والكوتشى بتاع الى من الكويت اتسرق عشان ارجع ارشح حد من النظام هههههههههههههه ... هنا الفكرة بقى انه مينفعش ندى صوتنا لحد من الناس دى ... وبعيدن هو شفيق دا يعنى مكنش عارف بفساد مبارك حتى لو هو ممتاز وتمام .. كونه انه يبقى مستمر فى نظام عارف انه فاسد معناه انه جزء منه ومينفعش نرجعه يمسك تانى اى منصب مش رئاسة ...
نيجوا بقى للاخوان طالما انت اثرت لنقطه دى ... بص انا مش مع الاخوان ولا ضدهم ... ولاخر وقت كنت محتارة بين مرسى وابو الفتوح ... ورجحت كفة ابو الفتوح الحقيقه لحد ما سمعت كلام ابراهيم عيسى فى الفيديو الى فى المشاركة الى قبل كدا دا .. شقلبلى دماغى كلها ورجحت كفة مرسى لانه الوحيد الى هيقدر على تنفيذ الى بيقول عليه ... وخصوصا انه ابراهيم عيسى لا بيحب الاسلاميين ولا حاجه فكانت مفأجأة من العيار التقيل يعنى .. وحاجه كدا لما تفهمها تتلخبط بجد ... المهم .. ردا على كلامك ... اولا من حق اى حزب فى مصر انه يقوم بالتقدم بمرشح للانتخابات .. والاخوان انهم يعملوا كدا دى مش جريمه دا حقهم ... الكلام الى قالوه فى الاول ورجعوا فيه فاكيد فى ظروف كتير ادت لدا ... اهمها وزى ما وضح للجيمع فى الفترة الاخيره ... انه مجلس الشعب عاجز عن عمل اى شىء واتخاذ اى قرار من غير موافقة العسكرى ... عايزين نحل الحكومة ... متقدرش ... العسكرى الى يقدر يعمل كدا ... عايزين نشكل حكومة جديدة مينفعش ... العسكرى هو الى بايده دا ... طيب امال ايه لازمته بقى مجلس شعب ولازمتهم ايه الاغلبيه والاخوان وانتوا مش قادرين تتخذوا قرارت بشان السياسه .. والسلطات كلها فى ايد العسكرى ...!!! يبقى لازم رئيس من فوق ... يقدر هو والبرلمان يكملوا من بعض ... فطبيعى هيطلعوا واحد منهم .... فكرة بقى يكتسحوا ويبقوا اغلبيه وحزب وطنى تانى والكلام دا ... ففكرة الاغلبيه والحزب الوطنى فى ذات نفسها مش فكرة وحشه ... هى تبقى لا تحتمل بس فى حاله انه الاغلبيه تبقى فاسده زى ما كان حاصل فى الحزب الوطنى ... كان فاسد ... اغلبيه فاسده الناس مش استحملتها ... لكن تخيل معايا لو كان الحزب الوطنى دا كويس وشغال لصالح البلد والشعب .. كانت الناس هتشتكى ولا هتتضايق .. ولا كانت هتتمنى البلد كلها تبقى منهم ... انا معنديش مشاكل الاخوان يبقوا اغلبيه بس يكونوا كويسين .. ويشتغلوا عشان صالح البلد دى ... وقتها هفرح انهم اغلبيه ... اغلبية الشر نكرهها ... واغلبية الخير نفرحوا بيها ... لكن مش اى اغلبيه ارفضها سواء خير بقى او شر فاهمنى ؟؟ طولت انا اوى جيمى بس والله سعيده بالنقاش معاك جداا ... ربنا يرحم الشهدا الى ادونا فرصة وسمحولنا نختار ونتكلم ونتناقش ونقول كل الى جوانا بحرية كدا .... بس انا مش عامله عشا جيمى النهارده ... انا اكبر منك بشهرين على فكرة انت الى المفروض تحضر هههههههههه ... روح ذاكر وادعى وخلينا ندعى معاك ربنا يولى المصلح .. شكرا للنقاش الجميل ...واسفه للاطاله ... تقبل كلامى ... كانت معكم .. مرشحتكم للرئاسه ههههههههههههههههههه ليلى المسلمه ...........................................................
موضوع: رد: رئيس مصر القادم الخميس 17 مايو 2012, 5:34 pm
جيمي نورت الموضوع وشكرا للمشاركة انا فاهمة انت ليه بترشح احمد شفيق وكمان انا سمعت البرنامج بتاعه هو بيقول كلام حلو اوووي ولو نفذه هيكون فعلا حاجة كويسة اوووي للشعب بس بصراحة انا مبقبلوش كشخص معرفش ليه علما باني عندي احساس انه هو هيخلي عمر سليمان في ارقى المناصب نظرا للصداقة اللي بتجمعهم وانه كان مستعد يتنازل عن الترشح لاجل عمر سليمان ربنا يهدينا للصالح امين يارب والحقوق ترجع لاصحابها
موضوع: رد: رئيس مصر القادم الخميس 17 مايو 2012, 5:44 pm
ليلى شكرا للمشاركة محمد مرسي مفيش كلام عليه رجل محترم بس ليا تعليق هو في احد البرامج اقسم بالله العظيم انه هينام اربع ساعات وبس عشان يرعى مصالح الوطن من اولها كدب اهو ال اربع ساعات ال وبعدين مش حابة صراع الاخوان على الرئاسة والمناصب وكمان انهم اخرجو فتوى بتاثيم من لا ينتخب محمد مرسي ال بكدة يبقى احنا مش عايزنها بلد اسلامية وهو احنا ايه كفار احنا عايزين اللي يحكمنا يراعى رب العباد في شعبه مش يخرج فتاوي من اولها يا عالم لو مسكوا الحكم هيعملو فينا ايه لا لا الاخوان فقدو شعبيتهم في الفترة الاخيرة بسبب صراعاتهم على السلطة وانا بقولهم خليكو في الدين احسن لكم زمان الخلفاء كانو بيهربو من المسئوليه دي خوفا من الله ودلوقتي اللي بيدعو انهم هيطبقوا شريعة الله ويخافو ربنا فينا بيجروا ويتسابقو على تولية امر المسلمين ربنا يهدي
موضوع: رد: رئيس مصر القادم الخميس 17 مايو 2012, 5:47 pm
سلمى
شكرا لمرورك الجميل وانا اتفق معاكي الرأي ابو الفتوح رجل لا غبار عليه وانا سمعت برنامجه الانتخابي وعجبني كتير وحسيته صادق كما ان تاريخه السياسي نظيف فانا اميل لترشيحه كما انه له عندي قبول كشخصية ربنا يولي علينا الاصلح شكرا مرة اخرى ودي وحبي
موضوع: رد: رئيس مصر القادم الخميس 17 مايو 2012, 6:46 pm
LaMyS كتب:
ليلى شكرا للمشاركة محمد مرسي مفيش كلام عليه رجل محترم بس ليا تعليق هو في احد البرامج اقسم بالله العظيم انه هينام اربع ساعات وبس عشان يرعى مصالح الوطن من اولها كدب اهو ال اربع ساعات ال وبعدين مش حابة صراع الاخوان على الرئاسة والمناصب وكمان انهم اخرجو فتوى بتاثيم من لا ينتخب محمد مرسي ال بكدة يبقى احنا مش عايزنها بلد اسلامية وهو احنا ايه كفار احنا عايزين اللي يحكمنا يراعى رب العباد في شعبه مش يخرج فتاوي من اولها يا عالم لو مسكوا الحكم هيعملو فينا ايه لا لا الاخوان فقدو شعبيتهم في الفترة الاخيرة بسبب صراعاتهم على السلطة وانا بقولهم خليكو في الدين احسن لكم زمان الخلفاء كانو بيهربو من المسئوليه دي خوفا من الله ودلوقتي اللي بيدعو انهم هيطبقوا شريعة الله ويخافو ربنا فينا بيجروا ويتسابقو على تولية امر المسلمين ربنا يهدي
وهذا مجرد راي تقبلي رائيي
لا طبعا لميس محدش يوافق على موضوع التاثيم والتحريم والكلام دا ... انا نفسى ضد الموجة دى وضد الناس الى بتطلع كلام زى دا ... محدش يملك حق تكفير التانى او تاثيمه على اختياره طبعا ....دا كلام غير مقبول بالمرة ... بس كويس انه قال هينام 4 ساعات انا حاسه انه الى هيمسك مصر مش هينام خالص ياعينى ههههههههههههههه ... والله هى مسئولية ... ربنا يكون فى عون الى هيتحملها بجد ... المهم يحاول يكون ادها وعلى دا ماايقدر يتقى ربنا فى مصر واهلها وشعبها ... سعدت لميس بمناقشتك جداا ... تسلمي يارب .. ليلى المسلمه ......................................
موضوع: رد: رئيس مصر القادم السبت 19 مايو 2012, 6:53 pm
مع العلم ان اي مرشح الناس هتختاره مش هعارض عليه
واللي بيقول ده فلول وهعمل ثورة لو مسك يبقي صراحه ضد الديموقراطيه
انا انتخب اللي يعجبني واحترم راي اغلبية الشعب
سواء كان فلول او اخواني او ليبرالي
اللي انا شايفه الان ان كل محبي مرشح بيطلعوا عيوب المرشح الاخر
ومش هيقبلوا لو اي حد كسب غير مرشحهم
وده بقي حوالي 80% من الناس
يعني لو اي حد كسب هتلاقي له معارضين
تعليقا بس على كلام حضرتك استاذ مراد ... هو كل المرشحين عمالين يطلعوا فى عيوب بعض دا حاصل فعلا ... بس فى النهايه دا برضو كل واحد بيختار الى بيشوف انه الافضل بالنسبه له ... بس انا واثقه انه الشعب هيرضى وهيقبل باى نتيجه للانتخابات مهما كانت .. الا لو كانت فلول ... دى الحاله الوحيده الى بجد هيبقى صعب فيها اوى اننا نقبل بالوضع ... وعشان كمان فى ظل كل الى بيحصل والظروف دى .. الفلول مرفوضين من الثوار ومن كل القوى الثورية ومن الاخوان ومن السلفيين ومن 6 ابريل وكفاية واغلب الاحزاب فى مصر ومن اهالى الشهدا ومصابين الثورة ... فطبعا لو واحد منهم كسب هتبقى واضحه اوى انه تم تزوير فى الانتخابات ... عشان مش معقول كل دول مش معاهم وفى الاخر هما الى يمسكوها يعنى ... الناس هترضى باى رئيس يجى مهما كان قدر الاختلاف معاه او عليه ... بس الى محدش هيقبل بيه ابداا انه يجى حد من الفلول ... انا هرشح مرسى مثلا بس مش هعارض لو اخدها ابو الفتوح او حمدين او او من الاسماء الاخرى .. بس الى مش ممكن حد يقبل بيه انه يرجعولنا النظام البائد فى صورة جديدة ويضحكوا علينا .. يعنى مش هنلاقى انصار صباحى واقفين عمالين مظاهره على ابو الفتوح عشان كسب لالالالالالا الكلام دا مش هيحصل بين اى مرشح والتانى ولا حتى الاخوان هيعملوا كدا ... الحالة الوحيدة الى هيحصل فيها كدا لو فلول ... وقتها بقى الكل هيتجمع وينزل مش انصار مرشح بعينه وقتها الكل ... الشهدا الى هما كانوا السبب فى الى احنا فيه دلوقتى وانه صوتنا يبقاله قيمة ... ماتوا فى ظل وعهد الناس دى ... احنا مش هنموت الشهدا مرتين احنا عايزين نجبلهم حقهم الى مش عارفين ياخدوه لحد النهارده .. لو حد خدها من الفلول الناس هتنزل تانى وهتبقى ثورة تانى واصعب من الاول كمان ... عشان هنكون لسه مش اسقطنا النظام ... والناس نزلت من الاول عشان تسقط النظام ... لكن لو اى حد تانى حتى لو مش المرشح الى كل واحد انتخبه هو الى فاز محدش هيتكلم .. وهنرضى بيه لحد ما نشوف هيعمل ايه ... لكن فلول هننزل وهنلبس اسود كمان ... ويحرقونا فى الميدان زى ما قال شفيق ... على الاقل نبقى موتنا بشرف مرضناش بذل وبعنا دم الشهدا وسكتنا على موتهم ....
وانا مع حضرتك فى موضوع الاتهامات الى بتتقال بالباطل ... بس برضو هرجع واقول الفلول بالذات محدش بيتهمهم بحاجه مش فيهم ... الفلول جزء من النظام الفاسد وكانوا متسترين على فساده ... خدعوا الشعب زيهم زى الحراميه دا ان مكنوش هما كمان فاسدين وحراميه ... واهو كل يوم فيه حاجات كتير بتظهر بتدل على الكلام الى بنقوله بخصوص الفلول وفسادهم ... اى حد من النظام الى فات دا يستاهل يبقى بيتحاسب دلوقتى ... مش يرشح نفسه للرئاسه ... وحسبنا الله ونعم الوكيل .. وولى الله من يصلح ... انا بس حبيت اعلق واقول رأيى بخصوص كلامك من حيث تأييد او اختلاف لايفسد للود قضيه ... وسورى انى بتدخل كتير وبتكلم يامه بس انا ضد الفلول وضد انى اشوف دم الشهدا يروح ومش انطق .. دى اقل حاجه الواحد يقدر يعملها ... وكل الشكر للموضوع الجميل والنقاش الهادف ... ليلى المسلمه .....................................................
موضوع: رد: رئيس مصر القادم الثلاثاء 22 مايو 2012, 10:20 pm
بكرة ان شاء الله الانتخابات ... لازم نعرف انه صوتنا امانه ونديه للى يستحقه ... ولازم لازم لازم واحنا رايحين ... نفتكر الناس الى فقدت عيونها عشان احنا نشوف ... والناس الى فقدت حياتها عشان احنا نعيش ... ابقوا ادعوا لشهداء مصر الى خلونا فى اول مرة فى حياتنا رايحين ننتخب رئيس جمهورية .... رحم الله كل شهدائنا وصبر قلوب اهلهم وولى علينا من يعيد حقهم امين ... ليلى المسلمه ......................