السلام عليكم ورحمه الله وبركاته
اولا ازيكو كلكو وحشتونى خالص خالص وبقالى زمان مش بكتب حاجه
من فتره كنت بتكلم مع ناس زمايلى شباب وبنات فالكليه عندى وبسال كل واحد هيعمل ايه فالاجازه بما ان خلاص احنا تقريبا فنهايه الترم
لقيت رد واحد واجماعى من البنات هو انهم هيتخطبو او هيتجوزو
كل ما اكلم واحده تقولى انا هتخطب او هتجوز وانتى؟؟
ولما لقيت حال البنات كلها كده
لقيت واحد لسه فسنه تانيه كليه وقدى وخاطب بقوله هو انت هتعمل ايه فالاجازه قالى هشتغل ليل ونهار عشان مصاريف الخطوبه
فسالته هو انت ليه خطبت انت فتانيه كليه كده يعنى سنك لسه صغير؟؟
قالى اومال احنا عايشين ليه مش عشان نتجوز ونخطب ونكمل نص دينا كمسلمين استغربت اوى لكلمته
سالت واحد تانى قالى هشتغل وبتاع بقوله عشان تساعد نفسك مش كده قالى اه وعشان اجهز الشقه واعرف اتجوز!!
لقيت ان المحور الاساسى بتاع كل الناس هو الجواز
الناس بتشتغل عشان تتجوز وبتتعلم عشان تتجوز!!!
طب يعنى دلوقتى الجواز بقه هو اول اهتماماتك فى الحياه
كل البنات بتقول امتى اتجوز بقه وارتاح بقه واضمن انى مش هعنس
اصل الجواز على راى صاحبتى ستره يعنى حاجه مهمه
طب دلوقتى الشباب بيتخرجو ويقعدو يلفو على شغل ولازم يشتغل ما البيه عليه مصاريف خطوبه وشبكه وشقه وفرح وبلاوى سوده
وقدرت وعملت فرح وليله كبيره واتجوزت وربنا قدرك والحمدلله
هتلاقى نفسك بعد الجواز بتشتغل اربعه وعشرين ساعه فاربعه وعشرين ساعه
اولا عشان تكفى مصارف نفسك ومصاريف واحده تانيه بقت ملزومه من حضرتك
ثانيا عشان تعمل حساب الاطفال الى جايين فالسكه
وبعدين تلاقى حضرتك كبرت مره واحده فالسن وبقى قدامك بنوته عروسه مطلوب منك تجهزها وابن راجل مطلوب منك تساعده يقف على رجله
وتبدا رحله كفاحك من اول وجديد
طب قولى بقه امتى هترتاح فالليله دى كلها ؟؟
والبنات الى كانت مدندشه وواخده بالها من نفسها فالجامعه ولابسها والميك اب واخر روقان ومكنش ليها غير عن الكلام فالموضوع مره واحده اتجوزت ولقت نفسها فوسط زحمه العيال وشغل البيت اتجوزت عشان تكنس وتمسح وتطبخ وتربى العيال!!
ولو جوزها جه فمره يبصلها مش هيلاقى ان دى زميلته الى اتجوزها ولا كانت ايام الخطوبه بقت مبهدله فنفسها ولو كلمها تقوله بص انا مش فضيالك ومش ناقصاك مش كفايه عليا عيالك بقى هو ده الجواز!!
ومحدش يقولى مش هو ده الى بيحصل لا هو ده الى بيحصل
انا شايفه ان التسلسل الطبيعى للشباب
انهم يدخلو الجامعه يحبو ويقابلو البنت الى بيحبها وبعدين يلاقى نفسه مره واحده قاعد بياكل جاتوه فالصالون ولبس دبله فايديه وبعدين خارج مع خطيبته بعدين هيروح البيت مع مراته وبعدين جاب عيال وبعدين يقعد معاهم وبعدين يذاكرلهم وبعدين يروح يخطب لولاده!!!
هو ده بقه التسلسل الطبيعى الى احنا عايشين فيه؟؟
انا طبعا كل كلامى على روتين الحياه والشباب بقت بتفكر ازاى مش على فكره الجواز نفسها لان الجواز هو نص الدين وحاجه ربنا امر بيها
بس هسال سؤال واحد
هل هتحس ان حياتك بعد الجواز احسن من قبل الجواز فيوم من الايام؟؟
انا عايزه اوصل من كلامى ده كله ان مينفعش انى احط قدامى انى بشتغل عشان اتجوز وانى بتعلم عشان يبقى معايا شهاده واعرف الاقى عريس كويس
انا بشتغل اوب تعلم عشان ده واجبى ودورى قدام ربنا وعشان انفع نفسى مش عشان الاقى عريس
ماهو انا لو بعمل كده عشان العريس يبقى الى انا قلته فوق هو الى هيحصل بالظبط
انا عارفه ان المصير الطبيعى للانسان الجواز واكيد انا كمان هيجى عليا يوم واتجوز
بس هل انا هدفى فالحياه وفى حاجاتى الى انا بعملها انى بعمل كده عشان فالاخر الاقى لنفسى عريس؟؟
يبقى انا كده بتجوز عشان اشتغل غساله وطباخه وامسح واكنس؟؟
لما الجواز يبقى مجرد انى اتجوز واحد يصرف عليا وانا اكنس وامسح واطبخ واربى عيال هو ده بقه الجواز؟؟
انا عايزه اسال بقه الى لسه عازب او عازبه عامه
انت شايف ان انت بتشتغل و بتتعلم عشان بس تتجوز؟؟
انت ايه نظرتك للجواز او انت شايف هو ايه بالنسبه ليك؟؟
وشايف ان الجواز دى بدايه دورك فالحياه ولا نهايه دورك فالحياه؟؟
طب هو ايه اكتر هدف مسطير عليك دلوقتى ولو قلتلى انى اشتغل واخلص هقولك ليه هتقولى عشان اتجوز؟؟
نيجى بقه للى متجوزين هنا
انت شايف نفسك ازاى بعد الجواز حياتك اختلفت ولا لا؟؟
شايف نفسك احسن قبل ولا بعد؟؟
ايه ايجابيات الجواز من وجه نظرك؟؟
ماهى نظرتك زوجك او زوجتك ليك بعد الزواج ؟؟ هل هى نفس النظرة ايام الخطوبه وسابق عهدها ؟
ماهى السلبيات التى اكتشفتها بعد الزواج وللاسف لم ولن تتخلص منها ؟
كلمه اخيره كتلخيص للموضوع
انا هدفى منه لما تيجى تتجوز متدورش على علاقه روتينيه وبس وعلاقه سى السيد بامينه وامير بواحده كل همها التنضيف وشغل البيت
لا اتجوز عشان تعيش حياه اتنين بيحبو بعض حبيب وحبيبته
ويارب كل اتنين بيحبو بعض لما يتجوزو يبعدو عن روتين الحياه الى بيبقى سبب فالملل والمشاكل ويقدرو يعيشو حياه مختلفه عن الى بنشوفها مكرره فى كل بيت اليومين دول
موضوع: انا اتجوزت طب وانت 
الأربعاء 20 مايو 2009, 3:19 pm
