من أروع أعمال شاعر العاميه (علي سلامه)

بوابة تفتيش على بابك


كل ما احَاول أعدى تزمر


وبتتشرط


وبتتأمر


أرَجَع أدَور تاني وأدور


وكل ما أعدي برضه تزمر


دب أدي الساعة


وأدي حزامي


وآدى بطاقتي


والنضارة


وآدى عنواني


وكل حَكَايَتي


وآدى أمارة


حتى الفكة الباقية في جيبي


والأشعار


والمحفظة مفيهاش غير صورتك


ليل ونهار


كل هدومي


زي ما نازل من بطن أمي


من غير حتى ورقة توت


وكل ما أفوت


البوابة برضك تزمر


ولما لمحني


واحد طَيب م الحراَس


وقَاللي اسْمَعني يا ابن اَلَناس


إرمي الحته الحلوة في قلبك


وعَدى


والبَوابَة عمرهَا


ما تزمر

جمهورية إمبابة


قالت لي


أنبوبة البوتجاز بتنفس


قولتلها


الحمد لله إن لسه


فيه غاز


ولسه قادرين نتنفس


قالتلي النور قطع


قولتها


يا ستي نحسس


قالتلي


الرغيف اتسخط


قولتلها


فرصة بقي نخسس


قالتلي


مش هاينفع كده


قولتلها ده كده كويس


وطي صوتك


يقولوا علينا عملاء


وخونة وبنتجسس


لصالح جمهورية إمبابة

تحس إن البلد بتصحي م النوم


بتقول آه يا ضهري


شعرها منكوش


وصوتها مبحوح


كأنها كانت نايمة


ف عشة الفراخ


اللي فوق السطوح


وتسند علي مين


ده الكل مدبوح


لا ضل راجل


ولا ضل حيطة


مفيش غير شوية زيطة


تيجي شوية


وبعدين تروح

صباح الخير


مين ده اللي مصر


عملت له توكيل


بالبيع لنفسه وللغير


وكمان بنقل الملكية


مين ده اللي مصر


وقعت أوي كده في هواه


وكل ما يتكلم تقول الله


وكل دقيقة تغنيله أغنية


ومين ده بقي اللي معاه


مفاتيح الشاي والسكر


والهوا والنور والحرية


طب إيه رأيك


التوكيل ده مضروب


بص كده معايا يا عم عطية


ماعرفش يا ابني


تعالي نسأل في الشهر العقاري

ايه ده ..؟!!


بالصلاة ع النبي


احنا عندنا اسمه ايه ده


أحسن واحد يحلل مباريات

يحط التشكيل


الأساسي والبديل


ويقولك إمتى تلعب براسين حربة

وإمتى تلعب من غير راس


ولو ضميرك مش مرتاح

وعندك إحساس


بلاش تشوط ع التلات خشبات

وعندنا اسمه ايه ده


أحسن مهندس خبير

بيرمش بس للبير


طلع غاز وبترول

وينزل دهب م الحنفيات

وعندنا اسمه ايه ده

أحسن سمكري ف التلاتين سنة

الأخيرة

تخش من مجرى العيون

على عين الصيرة

هتعرفه من مناخيره

ومن شكل العربيات

وعندنا اسمه ايه ده


مجرم قانون دولي ودستور

وإيده خفيفة أوي

في التعديلات


يشيل من هنا

ويحط هنا

جواهرجي يا ربي

مُلقاط

وعندنا اسمه ايه ده

أحسن واحد يحط الفول عالطعمية

ويعمل سندوتشات

وعندنا اسمه ايه ده

أحسن دكتور


مسالك وعظام وقلب وغرام

من نظرة عينك يعرف


كل الحاجات

ولا روشتة ولا إبرة ولا تحليل

ولا إشاعات


وعندنا اسمه ايه ده

أحسن حانوتي آثار

والله لو جاله برد

أبو الهول يموت

وتنتحر الأهرامات

وعندنا اسمه ايه ده

أحسن كاتب

وأحسن مخرج رقص


وأحسن جزار كوارع وعكاوي

وحلويات

وعندنا اسمه ايه ده

ملوش حل ف الزراعة

فواكه وحبوب وخضروات

يقول للأرض قمح

تقوله حاضر

ونخبز ونعمل بسكويت

وفينو بسمسم وبقصمات

وعندنا اسمه ايه ده

صاحب القهوة

كلنا نتيتم ونتشرد

لو بعد الشر

زي الناس ما بتموت

مات

يا أخي انا مش عارف ..

لما أحنا عندنا

اسمه ايه ده

واسمه ايه ده

أمال اسمها ايه دي

مصر ..

مبتتقدمش ليه

وتعبت ..

وزهقت ..

وداخت ..

ولفت السبع لفات

الطريق الدائري




جميل منظر النيل..

من ع الدائري..

والنسمة اللي بتقدر تفوت..

سرقة كده من وسط البيوت..

بس يا ريت بقي..

حد يلحق الشجرة الكبيرة..

قبل ما تدبل وتقع وتموت..

أسند علي سور الكوبري الحديد..

وأحلم وأسرح بعيد..

يصحيني صوت عربيات شايلة كراتين..

أغني هلت بشاير الدعم..

يا حلاوة بطاقة التموين..

بس من إمتي السكر والسمن..

بيمشوا ف حراسة الأمن..

وتحت عيون المخبرين..

قلت يا واد

اقطع الشك باليقين..

سألت واحد م السواقين..

سكر ده يا حاج..

قاللي ده مر متعبي ف شوية قوانين..

قلت خير برضه..

يمكن عشان نحارب الفقر والجهل..

ويرجع تاني يطلع الفرح سهل..

م القلب الحزين..

أم يمكن عشان الاحتكار..

وحدوتة الأسعار..

والتجار الطماعين..

أو يمكن عشان الصحة والتعليم..

والطفل اليتيم..

وحقوق المعاق قبل السليم..

أخيراً بقينا بني آدمين..

لكن لما سمعت صوت بيقول..

إنت ياض يا اللي هناك..

يا زفت الطين..

عرفت إن ده كله عشان نخاف..

ونخاف ونخاف..

أكتر ما إحنا خايفين.

يسلموو محمد اففندى على مجهوودك الرااائع والجيميل ده

تقبل مرورى

مجهود رائع استاذنا الفاضل

تسلم الانامل

كل الشكر علي محاوله معرفه الناس بشاعر العاميه دمت بكل ود واحترام

تقبل مروري العطر علي الورود

تحيااتي **** smsm

الســــــــــــــلام عليكم
تســـــــــــلم ايدك استاذ محمد علي الموضوع اولا

ثانيا تســــــــــــلم لان حضرتك عرفتنـــــــــا بشاعر جميل اوي

لك منـــــــــــي ارق الامانـــــي

وجزاك الله خيرااا