موضوع: يوميات (( MaZzIkaaaa )) على احلام عمرنا ^^ متجدد الثلاثاء 27 أكتوبر 2009, 1:27 am
تدخل والدة احمد إلى حجرة ولدها علشان تصحيه يروح الجامعة وتخبط على ظهره بالراحه كده أم بقي انتو فاهمين.
الام : احمد ... احمد .... قوم يا حبيبى
فيفتح الولد عيناً واحدة ينظر بها إلى أمه فى استغراب
احمد : إيه يا ماما فيه إيه ؟
الام :قوم يا حبيبى عشان تلحق تروح كليتك ؟
احمد : يا ماما كلية إيه اللى بتصحينى عشانها وش الفجر
الام : وش الفجر إيه بس... يا بنى الساعة داخلة على عشرة ...
قوم يا حبيبى عشان تلحق محاضراتك
احمد : ياماما نفضى
الام : أعمل إيه
احمد : يعنى كبرى يا ماما
الام : الله اكبر
احمد : لا يا ماما مش قصدى ... أن بقولك كبرى دماغك يعنى
الام : يا ابنى قوم متتعبنيش .... مش انت عندك محاضرات مهمة النهاردة ؟
احمد : يا ماما مهمة إيه بس ... ده كله فى الكلتشة
الام ( متعجبه ) : يعنى إيه كلتشة يا بنى .... انت مش عندك محاضرات مهمة النهاردة
احمد : يا ماما ... فكك من كلام الستينات ده.... أنا مش قادر أفك رموز وشى
الام : يا بنى قوم أخوك بيقول ان المحاضرات النهاردة عندك مهمة
احمد : يا ماما سيبك منه ... ده واد بيهيس
الام : يعنى إيه .... يعني كلامه صح ولا غلط ؟
احمد : يا ماما ... ابنك ده دماغه مخرومة ... عمالة تنقط .... متسمعلوش و لما يكلمك سد ودانك لحسن ياكلها .... و الودان اليومين دول غالية ... ملهاش قطع غيار
الام : يا بنى انت بتتكلم كده ليه ؟
احمد : يعنى بكلمك بالسيم يعنى .... بصى يا ماما عشان خاطر ربنا ... سيبنى أنام كمان خمس ست ساعات عشان أقوم فايق .... أنا كنت سهران طول الليل ... سيبنى أأنتخ شوية
الام : تأنتخ ؟ ... الله يخرب بيتك مش فاهمه منك ولا كلمة لا انت و لا أخوك
احمد : و الله يا ماما أنا مأفور خالص و مش قادر ... سيبنى
الام : يا بنى كلمنى زى ما بكلمك ... إيه اللى انت بتقوله ده
احمد : يا ماما هو انت عشان صاحيه بدرى لازم تصحينى أنا كمان بدرى ،سيبينى أنا عارف مصلحتى .
الام : مصلحتك ؟ يا بنى انت بقالك ثلاث سنين فى سنة ثانية
احمد : ظلم يا ماما ، الدكاترة بتاعة الكلية حاطينى فى دماغهم لحد ما عفنت
الام : (وقد بدأت تتغاظ ) طيب قوم يا معفن ... خد لك دوش و افطر و روح الكلية
احمد : امى .. اقفلى النور و خدى الباب وراكى .... و أما أقوم نبقى نشوف موضوع الدش ده
الام ( بصوت مرتفع ) : أنت حتقوم و لا حقومك بالجزمة
احمد ( يجلس على السرير ) : يا فتاح يا عليم .... الواحد لسة معملش استمورننج و بيتهزأ على الصبح
تخرج الام و يدخل أخوه عمر فينظر إليه
احمد : لازم تديها جاز على الصبح .... شعللتها ؟ ... ماشى